கவிமலர்களில் தமிழ்த்தேன் அருந்திட அன்புடன் அழைக்கிறேன்!

திங்கள், ஏப்ரல் 16, 2018

மனித உணர்வுகளின் வெளிப்பாடாக அமையவேண்டும் ....தமிழ் ஐக்கூ கவிதைகள் !

மனித உணர்வுகளின் வெளிப்பாடாக அமையவேண்டும் ....தமிழ் ஐக்கூ கவிதைகள் !
********************************************************************
தமிழ் ஐக்கூ கவிதைகள் ஒரு நூற்றாண்டைக் கடந்து வெற்றிநடை போட்டுக் கொண்டிருக்கிறது.
கவிதைகளின் பரிணாம வளர்ச்சியில் துளிப்பாக்கள் (ஐக்கூ கவிதைகள் ) தமிழ் கவிதை உலகில் இனிய தடம் பதித்து வருகிறது என்பதில் ஐயமில்லை.
ஒரு கவிதை சமுதாய மாற்றத்தைக் கொண்டுவருமேயானால் அது ஜீவனுள்ள வரிகளையும் சொற்களையும் தன்னகத்தே கொண்டு ஒரு இயக்கத்தையே நடத்துகிறது என்பது உண்மை.
திரையுலகில் பட்டுக்கோட்டை கல்யாணசுந்தரம், கவியரசு கண்ணதாசன், கவிஞர் வாலி போன்றோரின் பாடல்வரிகளில் உயிரோட்டமான சொற்களும் வரிகளுமே காலம் கடந்து நிற்கும் தன்மைக்கு அடிப்படை ஆகும்.
எளிய தமிழ் சொற்களால் கோடானுகோடி மக்களின் இதயத்தை கொள்ளையடித்த கவிஞர் கண்ணதாசன் அவர்களின் பாடல் வரிகளில் இந்த சமுதாய முன்னேற்றத்துக்கான விதைகள் தூவப்பட்டன.
இலக்கிய உலகில் பக்தி இலக்கியம் தொட்டு, சங்க இலக்கியம் மற்றும் சங்கம் மருவிய காலம் வரை அலைகடலாய் தமிழ் இலக்கிய வரலாறு பார்போற்ற ஒளிவீசிக் கொண்டிருக்கிறது.
இந்த வரிசையில் காலம் கடந்து நிற்கும், வாழ்ந்துகொண்டிருக்கும் ஐக்கூ (துளிப்பாக்கள் ) கவிதைகள் நூற்றுக் கணக்கான கவிஞர்களின் விரல்களில் பிறப்பெடுத்த பெருமைக்கு உரியதாகும்.
இந்த வரிசையில் தடம்பதித்த/தடம் பதித்து வரும் ஐக்கூ கவிஞர்களின் ஹைக்கூ கவிதைகள் தினம் தொடராக எனது பார்வையில் வெளியிட விரும்புகிறேன்.
இந்த ஐக்கூ கவிதைகள் விமர்சனங்களுக்கு அப்பாற்பட்டவை. விளக்கம் கொடுத்து புரிய வைக்க வேண்டும் எனும் கட்டாயம் இல்லை. பன்முக நோக்கில் பொருள் கொள்ளும் ஆற்றல் மிக்க ஐக்கூ கவிஞர்கள் மத்தியில் நான் விளக்கம் கொடுக்க
விரும்பவில்லை... !
இந்த ஐக்கூ கவிதைகளை (துளிப்பாக்கள்) உள்வாங்கி கவிதையின்பம் பெற அன்போடு அழைக்கிறேன்...!
தற்போது ஐக்கூ எழுதும் இளைய தலைமுறைக்கும் இந்த ஐக்கூ கவிதைகள் எடுத்துக் காட்டாய் விளங்கும் என நம்புகிறேன்.
காலத்தை வெல்லும் தமிழ் ஐக்கூ கவிதைகள்....தொடர் ..1
*****************************************************
1. துணிகளில் தெரிவதில்லை
நெசவாளனின்
கருத்த விரல்கள்
......ஏகாதேசி
2. பசித்தழுகிறது குழந்தை
ரப்பர் மரத்தில் பால் வெட்டியபடி
வற்றிய மார்போடு அம்மா
.....ஏகாதேசி
3. சருகு பொறுக்குவதில்
சரியாகிறது நேரம்
குளிர் காய்வது எப்போது ?
.....பல்லவி குமார்
4. தீக்குச்சி இறந்தது
தீபத்தில்
அசைந்தாடும் உயிர்
......பழனி இளங்கம்பன்
5. அட...குடங்களுக்குக் கூட
சொட்டு மருந்து கொடுக்கிறதே...
நகரிய தெருக் குழாய்
......முகவை முனீஸ்
6. இருண்ட கிராமத்தின் வழியே
இரக்கமின்றி செல்கின்றன
நகரத்திற்கு மின்கம்பிகள்
......நாவம்மா முருகன்
7. பிச்சையெடுத்தான் சிறுவன்
பசி தீர்ந்தது
குடிகார அப்பாவுக்கு
.....நாவம்மா முருகன்
8. சங்கு ஊதியும்
எழுந்திருக்கவில்லை
ஆலைத் தொழிலாளி
.....சீனு தமிழ்மணி
9. இருட்டில் அமர்ந்து
மௌனத்தை தின்னும்
அணைந்த மெழுகுவர்த்தி
.....மு.முருகேஷ்
10. ஏற்றத் தாழ்விலும்
இணைந்த இயக்கம்
விரல்கள்
......கா.ந.கல்யாணசுந்தரம்
....................நாளை தொடரும்.............
(நன்றி: நீங்கள் கேட்ட ஐக்கூ தொகுப்பு நூல் - ஆண்டு 2000)

ஞாயிறு, ஏப்ரல் 15, 2018

உணர்வுமிக்க இலங்கைப் பயணம் ...தொடர் 4


உணர்வுமிக்க இலங்கைப் பயணம் ...தொடர் 4
************************************************************************

26/02/2018 அன்று திருகோணமலை பத்ரகாளியம்மன் ஆலயம் சென்று வழிபட்டோம். அடடா...என்னவொரு நேர்த்தியான சிற்பங்கள் கொண்ட கோயில். கோயிலின் மேற்புற கூரையில் அழகிய சிற்பங்கள் வடிவமைப்பு இருந்தது. இதுவரை இம்மாதிரியான கலை அம்சம் கொண்ட கோயிலைப் பார்த்ததில்லை. இந்தத் திருத்தல வரலாற்றை சிற்பங்களாக வடித்திருந்தனர்.

இன்றெல்லாம் கண்டாலும் நேரம் போதாது. காணக் கண்கோடி வேண்டும்.
பத்ரகாளி அம்மன் அச்சு அசலாக அருள்மிகு அங்காளபரமேஸ்வரி போன்ற தோற்றமுடன் வீற்றிருந்த காட்சி அற்புதம்.

இனி வரலாற்றைக் காண்போம்:
ஸ்ரீ பத்திரகாளி அம்பாள் ஆலயம் திருகோணமலை நகரின் மையப்பகுதியில்பேருந்து நிலையத்திற்கு மிக அருகாமையிலும் திருகோணமலை தொடருந்துநிலையத்திலிருந்து ஒரு கிலோமீற்றர் தூரத்திலும் அமைந்துள்ளது.
மேலும் இக்கோவில் பதினெட்டு மகா சக்தி பீடங்களில்தேவியின் இடுப்புப் பகுதி வி்ழுந்த பீடமாகவும் தந்திர சூடாமணிகூறும் 51 சக்தி பீடங்களில் தேவியின் சிலம்புகள் விழுந்த பீடமாகவும் கருதப்படுகிறது. ஒரு சிலர் உண்மையான சக்தி பீடக் கோவில் போர்ச்சுக்கீசியப் படையெடுப்பில் இடிக்கப்பட்டு விட்டதால் இந்தக் கோவிலின் அம்மன் சன்னதியே சக்தி பீடமாக வணங்கப்படுகிறது என்றும் கூறுகிறார்கள்.

இவ்வாலயத்தின் வரலாற்றினை திட்டவட்டமாக வரையறுத்துக் கூறமுடியவில்லையென்றாலும் இவ்வாலயத்தில் கிடைத்துள்ள கல்வெட்டுகள், பழைய சாசனங்கள், கர்ண பரம்பரையாக வழங்கிவரும் கதைகள், அக்கதைகளோடு தொடர்புடையதாய் தற்போது ஆலயத்திலிருக்கும் விக்கிரகங்கள், தகளி, வாகனம் என்பவற்றை ஆதாரமாகக் கொண்டு முதலாம் இராசேந்திர சோழன் காலமாகிய பதினோராம் நூற்றாண்டில் இவ்வாலயம் சிறப்புற்றிருந்திருக்க வேண்டுமென்று சரித்திரப் பேராசிரியர் செ. குணசிங்கம் குறிப்பிட்டுள்ளார்.
இவ்வாலயத்தில் கடந்த 150 ஆண்டு காலமாக மிகச்சிறப்பாக அனுட்டிக்கப்பட்டுவருகிறது கேதாரகௌரி விரதம்புரட்டாதி மாதம் விஜயதசமி முதல் ஐப்பசி மாத அமாவாசைத் திதிவரை நிகழும் 21 நாட்களுக்கான விரத அனுட்டானங்களில் பல்லாயிரக்கணக்கான பக்தர்கள் கலந்துகொள்வார்கள்.

விசயதசமியன்று நடைபெறும் கும்பவிழா திருகோணமலையில் இடம்பெறும் தனித்துவமான ஒரு விழாவாகும்.


திருகோணமலை கவிஞர் அருணாசலம் சிவானந்தம் அவர்கள் எங்களுடன் இத்திருத்தலத்தில் உடனிருந்து அழைத்துச் சென்றார்.. திருகோணமலையில் வசிக்கும் கவிதாயினிகள் சிவரமணி கவிச்சுடர் மற்றும் பிரிதிவிராஜ் லோஜி அவர்கள் நாயன்மார்கள் நற்றமிழ் சங்கம் நிறுவனர் ஸ்ரீகாந்த் ராஜா மற்றும் ஜாகிர் அவர்களுடன் இணைந்து கருத்தரங்கம் ஒன்றை ஏற்பாடு செய்திருந்தனர். தமிழகக் கவிஞர்களுக்கு மாலை அணிவித்து சிறப்பு செய்ததை மறக்க முடியாது.  ஈழத்துக் கவிஞர்கள் பலருடன் உரையாடியது மகிழ்வை தந்தது.

கூட்டம் முடிந்து கவிதாயினி பிரிதிவிராஜ் லோஜி அவர்கள் தங்கள் வீட்டுக்கு எங்களை அழைத்துச் சென்று இன்முகத்துடன் வரவேற்று தேனீர் கொடுத்தது இன்னும் கண்முன்னே காட்சி அளிக்கிறது. லோஜி அவர்களுடைய வயதான தாயார் மற்றும் குழந்தைகளுடன் புகைப்படம் எடுத்துக் கொண்டு கவிஞர் அருணாசலம் சிவானந்தம் அவர்கள் இல்லம் சென்றோம்.
அனைவரையும் வரவேற்று கவிஞர் சிவா அவரது மனைவியும் எங்களுக்கு இன்முகத்துடன்  அறுசுவை உணவளித்தது மறக்க முடியாது. நாங்கள் பயணப்பட்டு அன்றுதான் முழுமையான உணவருந்தி மகிழ்ந்தோம்.

இரவு விடுதியில் தங்கி மறுநாள் காலை வெந்நீர் ஊற்றில் குளித்து மகிழ்ந்தோம். மார்பல் பீச் -  பளிங்கு கடற்கரை சுற்றிப்பார்த்துவிட்டு  யாழ்பாணம் நோக்கி பயணமானோம்.

இனிய நேரங்கள்....

தொடரும்...அடுத்து....யாழ்பாணம் போகும் வழியில் ஓமந்தை கண்ணகி கோயில் வழிபாடு...

.........கா.ந.கல்யாணசுந்தரம்.








சனி, ஏப்ரல் 14, 2018

உணர்வுமிக்க இலங்கைப் பயணம் ...தொடர் 3


உணர்வுமிக்க இலங்கைப் பயணம் ...தொடர் 3
 ********************************************************



மட்டக்களப்பு – ஓட்டமாவடி இலக்கிய விழா முடித்து எங்களது பயணம் 26/02/2018 அன்று இலங்கையின் வடக்கு மாகாண தலைநகர்  திரிகோணமலை நோக்கி இனிதாய் நகர்ந்தது. திரிகோணமலை செல்லும் வழியெங்கும் அழகிய இலங்கை கடற்கரை இருபுறமும் காட்சி அளித்தது. இயற்கை எழில் சூழ்ந்த தமிழர் வாழும் பகுதிகள் நெஞ்சைக் கொள்ளை கொண்டது.

மதிய நேரம் திரிகோணமலை அடைந்து அங்கே விடுதியில் சற்று ஓய்வெடுத்து திரிகோணேஸ்வரர் திருக்கோயிலை கண்டு ரசித்தோம்.
இராவணனால் தரிசிக்கப்பட்ட புராதான சிவலிங்கம் தரிசனம் கண்டோம். இக்கோயில் புதுப்பிக்கப்பட்டு குடமுழுக்கும் தற்போதைய அரசால் செய்யப்பட்டு இருந்தது.

விக்கிப்பீடியா வரலாறு :
திருக்கோணேச்சரம் (திருக்கோணேஸ்வரம்இலங்கையின்கிழக்கு மாகாணத்தின் தலை நகரமான திருகோணமலையில்உள்ள ஒரு சிவன் கோயில் ஆகும். இலங்கையில் உள்ள இரண்டு தேவாரப் பாடல் பெற்ற தலங்களுள் இதுவும் ஒன்று. கிபி 7 ஆம் நூற்றாண்டில் வாழ்ந்த திருஞானசம்பந்தர் இக்கோயிலின் மீது ஒரு பதிகம் பாடியுள்ளார். வருடா வருடம் ஆலயத்தில் எழுந்தருளியிருக்கும் இறைவனின் விக்கிரகம் நகர்வலம் வருவதும் குறிப்பிடத்தக்கது. மேலும் இக்கோவில் பதினெட்டு மகா சக்தி பீடங்களில் தேவியின் இடுப்புப் பகுதி வி்ழுந்த பீடமாகவும் தந்திர சூடாமணி கூறும் 51 சக்தி பீடங்களில்தேவியின் சிலம்புகள் விழுந்த பீடமாகவும் கருதப்படுகிறது. ஒரு சிலர் உண்மையான சக்தி பீடக் கோவில் போர்ச்சுக்கீசியப் படையெடுப்பில் இடிக்கப்பட்டு விட்டதால் இந்தக் கோவிலின் அம்மன் சன்னதியே சக்தி பீடமாக வணங்கப்படுகிறது என்றும் கூறுகிறார்கள்.[2]

இராவணன் தென் இலங்கையை ஆட்சி செய்த காலத்திலே தட்சிண கைலாயம் எனப் போற்றப்படுகின்ற திருக்கோணேச்சரத்தைப் பூசித்து வந்தான் என்று மட்டக்களப்பு மான்மியம் என்னும் நூல் கூறுகின்றது. இராவணன் தன் தாயாருக்குச் சிவலிங்கம் ஒன்று பெற விரும்பிப் பெயர்த்த மலை தட்சிண கைலாயமாகிய கோணமாமலை என்று தட்சிண கலாய புராணங் கூறுகின்றது. இதற்குச் சான்று பகர்வது போன்று இம்மலைப் பாறையில் இராவணன் வெட்டு என்ற பெயருடன் மலைப் பிளவு ஒன்று இன்னமும் இருக்கின்றது. இராவணன் கிறிஸ்து யுகத்துக்கு மிகவும் முற்பட்ட காலத்தில் வாழ்ந்தவன் என்றும் அவனுடைய காலத்துக்குப் பின் கடல்கோள் ஒன்று நிகழ்ந்தது என்றும் ராஜாவளிய என்னும் புத்த சமய வரலாற்று நூல் கூறுகின்றது.

குறிஞ்சியும் முல்லையும் நெய்தலும் ஒன்று சேர்கின்ற ஓர் இடத்தில் இத்தலம் அமைந்துள்ளது. திருக்குணமலை திருக்குணாமலை திருமலை தென் கைலாயம் கோகர்ணம் திருகூடம் மச்சேஸ்வரம் என்பன இத்தலத்தின் பிறபெயர்கள் ஆகும்.
இத்தகு சிறப்புமிகு இடத்தை மூன்று மணிநேரம் பார்வையிட்டோம். இம்மலைக்கு செல்லும் வழியில் மான்களும் மயில்களும் ஒருங்கே இருப்பதைக் காண முடிந்தது. இயற்கை சூழல், மலைவளம், கடற்கரை பொலிவு அனைத்தும் சேர்ந்த இந்த மலைப்பகுதி கோயில் இராவணனால் வணக்கப்பட்ட லிங்கம் உள்ளது என்பதற்கு சான்றாக மலையின் அடிப்பகுதியில் இராவணனின் கோட்டைக் கொத்தளம் இன்றளவும் சிதலமடைந்து உள்ளது என்றார்கள். அதற்கு நாங்கள் சென்ற போது படகுப் போக்குவரத்து இல்லை.  எழில் சூழ்ந்த இயற்கை வளங்களோடு வாழ்ந்த இராவணன் வரலாற்றை கோயில் உள்புற மண்டபத்தில் ஓவியங்களாக வரையப்பட்டுள்ளது மிகச் சிறப்பு.

பார்க்கவேண்டிய பரவசமூட்டும் இடம்....

...............கா.ந.கல்யாணசுந்தரம்

தொடரும்....அடுத்த பதிவு வியப்பில் ஆழ்த்தும் திரிகோணமலை பத்ரகாளியம்மன் கோயில் சிற்பங்கள்






வியாழன், மார்ச் 08, 2018

உணர்வுமிக்க இலங்கைப் பயணம் ( தொடர் – 1)



உணர்வுமிக்க இலங்கைப் பயணம் ( தொடர் – 1)
*******************************************************************
இலங்கை மட்டக்களப்பு – ஓட்டமாவடி “ நுட்பம் “ இலக்கிய ஆண்டு விழாவுக்கு பத்துபேர் கொண்ட கவிஞர் குழுவுடன் 24/02/2018 அன்று பயணமானோம். பிப்ரவரி 25 அன்று விழா இனிதே முடிந்தது.
விழா நிகழ்வுகள் சிறப்பாக இருந்தன. இலங்கை பயணம் தொடங்கியது முதலே..... மனதுக்குள் ஈழத் தமிழர்கள் தங்களது வாழ்வாதாரத்தை இழந்து அகதிகளாக பல நாடுகளில் தங்கி அமைதிச் சூழல் ஏற்பட்டபின் தங்கள் தாயகம் திரும்பிய......நிலையை மனதுக்குள் ஒரு ஏக்கமாய்..... நினைவலைகளை சுழலவிட்டபடி இருந்தேன்.
உலகின் மிகப் பெருமை வாய்ந்த யாழ்பாணம் பொது நூலகம் சிங்களவர்களால் தமிழர்களின்போரின் போது எரித்துச் சாம்பலாக்கிய நிகழ்வு எனது மனதில் மறையாத சுவடாக இருந்துவந்தது. நூலகத்தைப் பார்க்கவேண்டும் என்ற ஆவல் கொழுந்துவிட்டு எரிந்தது. 28/02/2018 அன்று ஜாப்னா – யாழ்பாணம் சென்றதும் நாங்கள் யாழ்பாணம் பொது நூலகம் இருந்த இடம் நோக்கி சென்றோம்.
நூலகக் கட்டடம் புதுப்பிக்கப்பட்டு மீண்டும் இயங்கிக் கொண்டிருந்தது. நாங்கள் நண்பகல் இரண்டு மணி அளவில் சென்றோம். மாலை நான்கு மணிக்குதான் அனுமதி என்றனர். நாங்கள் தமிழகத்தில் இருந்து எட்டுபேர்கொண்ட கவிஞர் குழு வந்திருக்கிறோம் என்றவுடன் அனுமதி அளித்தனர். உட்புறம் புகைப்படம் எடுக்க அனுமதிக்க வில்லை.
நூலகத்தில் பல்கலை மாணவர்கள், பொதுமக்கள், தமிழ் ஆர்வலர்கள் பலர் புத்தகங்களில் மூழ்கி குறிப்பெடுத்துக் கொண்டிருந்தனர். தென்னிந்திய தமிழ்ப் புத்தகங்களுக்கு தனியான ஒரு பகுதி கொடுக்கப்பட்டிருந்தது. அங்கு யாழ்ப்பாண வாசகர் எங்களுக்கு அறிமுகமாகி உள்ளே அழைத்துச் சென்றார். இந்த நூலகம் முற்றிலும் எரிந்தது என்றும் லட்சக்கணக்கான பழம்பெரும் நூல்கள், ஓலைச்சுவடிகள், ஆய்வேடுகள் அனைத்தும் எரிந்து சாம்பலானது என்று அவர் கண்களில் நீர் ததும்ப கூறியபோது எங்களின் இதயம் கனத்து அழுதது. உலகம் முழுதும் உள்ள தமிழர்களின் உதவியாலும் தற்போதைய அரசின் தமிழ்ப் பிரதிநிதிகளாலும் நூலகம் புத்துயிர் பெற்றது என்றும் கூறினார்.
1981 ஆம் ஆண்டு சிங்கள வெறியர்களால் சூறையாடப்பட்ட, எரிக்கப்பட்ட நூலகம் மீண்டும் புத்துயிர் பெற்றுள்ளது மனதுக்கு இதமாய் இருந்தது.
எரிக்கப்பட்ட நூலகத்தின் புகைப்படம் அங்கே இருந்தது. எலும்புக்கூடாய் புத்தகங்களின்றி புகைபடிந்த அந்த நூலகக் கட்டடம் தமிழனின் அவலத்தை எடுத்துக் கூறியது.
இனி விக்கிப்பீடியா சொல்லும் செய்தியை இங்கு காண்போம் :
_______________________________________________
( விக்கிப்பீடியா:
யாழ் நூலகம் 1933 ஆம் ஆண்டில் இருந்து கட்டியெழுப்பப்பட்டு வந்துள்ளது. முதலில் சிலரது தனிப்பட்ட சேகரிப்புகளுடன் நூலகம் ஆரம்பிக்கப்பட்டு, மிக விரைவில் உள்ளூர் தமிழ் மக்களின் ஆதரவுடன் ஒரு முழு நூலகமானது. யாழ்ப்பாணத்தின் பல இடங்களிலும் தனிப்பட்டவர்களிடம் இருந்து வந்த பல நூல்கள், குறிப்பாக நூற்றாண்டுகள் பழமையான ஓலைச்சுவடிகள் 1800களில் யாழ்ப்பாணத்தில் வெளியிடப்பட்ட பல பத்திரிகைகளின் மூலப் பிரதிகள் போன்றவை இந்நூல்நிலையத்தில் வைக்கப்பட்டிருந்தன[5][6]. நூலகத்தின் முதலாவது கட்டடம் 1959 ஆம் ஆண்டு திறந்து வைக்கப்பட்டது[5][6].
யாழ்ப்பாணம் பொது நூலகம் எரிப்பு என்பது இலங்கை இனப்பிரச்சினையில் ஒரு முக்கிய நிகழ்வாகும். இந்நிகழ்வு 1981 ஆம் ஆண்டு சூன் 1 ஆம் திகதி இரவு சிங்கள வன்முறைக் குழுவொன்றால் இடம்பெற்றது.[1] இது 20ம் நூற்றாண்டின் இன, நூலழிப்புகளில் ஒரு மிகப்பெரும் வன்முறையாகக் கருதப்படுகிறது[2]. இவ்வழிப்பு நேர்ந்த காலகட்டத்தில் யாழ்ப்பாணப் பொது நூலகம் கிட்டத்தட்ட 97,000 அரிய நூல்களுடன் தென்கிழக்காசியாவிலேயே மிகப்பெரிய நூலகமாகத் திகழ்ந்தது[3][4]. இந்த நூலகஎரிப்பு வன்கும்பலில் இலங்கையின்அமைச்சர் காமினி திசாநாயக்கா உட்பட வேறு பல அப்போதைய சிங்கள அரசியல் தலைவர்கள் அடங்கியிருந்தனர். நூலகம் எரிக்கப்பட்டது ஈழத் தமிழ் மக்கள் மத்தியில் அழியா காயம் ஒன்றை ஏற்படுத்தி, தமிழ்த் தேசியப் போக்குக்கு உரம் ஊட்டியது.
• யாழ் நூலக வரலாறு, மற்றும் அதன் எரிப்பு குறித்த "The Jaffna Public Library rises from its ashes" என்ற பெயரில் ஓர் ஆவண நூலை கட்டிடக்கலை நிபுணர் வி. எஸ். துரைராஜா எழுதி வெளியிட்டுள்ளார்[7]
• எரியும் நினைவுகள் என்ற பெயரில் ஓர் ஆவணப் படத்தை ஊடகவியலாளர் சி. சோமிதரன் இயக்கி வெளியிட்டுள்ளார்.)
___________________________________________________
ஆம்...நண்பர்களே யாழ் பொது நூலகம் ஈழத் தமிழர் வாழ்விட வரலாற்றை பறைசாற்றியபடி இப்போதும் நிமிர்ந்து நிற்கிறது.
தொடரும்......
அன்பன்,
கா.ந.கல்யாணசுந்தரம் .
படங்கள்: எரிக்கப்பட்ட நூலகம் - நன்றி: கூகுள்
தற்போதைய நூலகப் படங்கள் - எங்களது பயணத்தின்போது எடுக்கப்பட்டவை ....

வெள்ளி, பிப்ரவரி 02, 2018

நான் ஏன் ஐக்கூ கவிதைகளை மிகவும் நேசிக்கிறேன்/எழுதுகிறேன்/ரசிக்கிறேன் ?




நான் ஏன் ஐக்கூ கவிதைகளை மிகவும் நேசிக்கிறேன்/எழுதுகிறேன்/ரசிக்கிறேன் ?
****************************************************************************************************************
* ஐக்கூ கவிதைகள் சுருங்கச் சொல்லி விளங்க வைக்கிறது
* கவிஞரின் சிந்தனை ஒன்றானாலும் கோணங்கள் விரிந்து பல காட்சிகளைத் தருகின்றன.
* எளிதாக சொல்ல வந்த கருத்தை மூன்று வரிகளில்
பதிவிடும் போது வரிகளின் அமைப்பில் என்னை நானே மறந்து விடுகிறேன்.
* சமூக அவலங்களைச் சுட்டி எழுதும் தற்கால கவிஞர்களின் ஐக்கூ கவிதைகள் தடம் பதித்து வருகிறது சமுதாய வீதிகளில் .
* இயந்திரமாய் உழலும் அவசர உலகில் இந்த மூன்று வரிக்கவிதைகள் படிப்பவர்களை கவர்ந்திழுக்கிறது.
குறுகிய கால அவகாசத்தில் படித்து சிந்தனையைத் தூண்டும் இயபினைக் கொண்டவை இந்த ஐக்கூ கவிதைகள்.
* கொடுக்கப்படும் படத்திற்கு ஏற்றவாறு மூன்று வரிகளில் எழுதப்படும் ஐக்கூ கவிதைகள் தற்போது அதிகரித்து வருவதுடன் சமுதாய மறுமலர்ச்சிக்கு உறுதுணையாய் இருக்கிறது.
* ஜப்பானிய ஜென் தத்துவம் என்பதிலிருந்து விலகி
தமிழ் மண் சார்ந்த மரபு வழியில் ஏராளமான தமிழ் ஐக்கூ கவிதைகள் இப்போது உருவாகி காலத்தால் அழியா கவிதைகளாய் வலம் வருகின்றன .
* திருக்குறள் ஒன்றே முக்கால் அடி, நாலடியார் நான்கு அடிகள் என தமிழுக்குப் பெருமை சேர்த்தது போல் ஐக்கூ மூன்று அடிகளில் சரித்திரம் படைக்கிறது.
* விடுகதை போன்றும், நகைச்சுவை துணுக்கு போன்றும் பல ஐக்கூ கவிதைகள் பயண நேரங்களில் நமக்கு உடல் சோர்விற்கு மருந்தாகவும், சிரிப்போடு சிந்தனையையும் கொண்டிருக்கும் மருந்தாகவும் ஐக்கூ கவிதைகள் உள்ளன.
* ஏராளமான தமிழ் முகநூல்கள், வார,மாத, காலாண்டு இதழ்கள் தமிழ் ஐக்கூவிற்கு பக்கங்களை ஒதுக்கி வெளியிட்டு வருவதும், கவிஞர்களுக்கு சான்றிதழ்கள், பரிசுத் தொகைகள் கொடுப்பதும் இந்த கவிதை உலகையே தமிழ் ஐக்கூ வடிவத்தின் பக்கம் திரும்பிப் பார்க்கச் செய்துள்ளது . மரபு வழி பயணிக்கும் பல இலக்கிய ஆளுமைக் கவிஞர்களும் தற்போது ஐக்கூ எழுதுகிறார்கள் என பெருமைப்படுகிறேன்.
* பல்கலை மாணவர்கள் ஐக்கூ நூல்களை பெருமளவில் ஆய்வு செய்து முனைவர் பட்டம் பெற முடிகிறது எனில் இந்த தமிழ் ஐக்கூக் கவிதைகளை எப்படி நேசிக்காமல் இருக்க முடியும் ?
* தமிழ் ஐக்கூ வடிவம் ஆய்வுக்கு உட்படுத்தப் பட்டு புதிய உத்திகளாக மோனைக்கூ , எதுகை ஐக்கூ என்றும் கண்டுபிடிக்கப்பட்டு வரவேற்பு பெற்றுள்ளதை ஐக்கூ வரலாறு பதிவு செய்வதோடு நான் மிகவும் ரசித்துப் படிக்கும் வகைமை அது.
* சிறு பிள்ளைகள் முதல் முதியோர் வரை விரும்பிப் படிக்கும் கவிதை வடிவம் ஐக்கூ என்பதில் ஐயமில்லை.
* அனைவர் கைத்தட்டலைப் பெரும் அளவில் ஐக்கூ கவியரங்கமும் அண்மையில் நடந்த கவியுலகப் பூஞ்சோலை முகநூல் ஆண்டுவிழாவில் அரங்கேற்றப்பட்டது மனத்தைக் கவர்ந்த ஒன்று.
* இவை எல்லாவற்றுக்கும் மேலாக எனது நேசிப்பிற்கும் எழுதுவதற்கும் ............. நல்ல சிந்தனையை உள்ளடக்கி மூன்று வரிகளில் பிறப்பெடுக்கும் பல ஐக்கூக் கவிதைகள் மனிதநேயமுடன் மானுடம் செழிக்க, மண்ணின் மரபு காத்து , கலாச்சார இலக்கணத்தை உணர்த்தி வருகிறது என்பதும் முக்கிய காரணமாய் விளங்குகிறது என்றே சொல்வேன்.
நீங்களும் வாசியுங்கள் தமிழ் ஐக்கூ நூல்களை.
அன்புடன்,
கா.ந.கல்யாணசுந்தரம்

திங்கள், நவம்பர் 13, 2017

நானிலு .... ( தன்முனைக் கவிதைகள் ) தமிழில் முதன் முதலில் புது வரவு

நானிலு .... ( தன்முனைக் கவிதைகள் ) தமிழில் முதன் முதலில் புது வரவு

நானிலு .... ( தன்முனைக் கவிதைகள் ) தமிழில் முதன் முதலில் புது வரவு – தன்முனைக் கவிதைகள் – வடிவமைப்பு – கா.ந.கல்யாணசுந்தரம் – இது தெலுங்கிலிருந்து தமிழுக்கு பயணித்த வடிவம்
********************************************************************************************************************
(கவிஞர் வதிலை பிரபா அவர்களின் மகாகவி மாத இதழில் கவிஞர் சாந்தா தத் அவர்கள் தெலுங்கிலிருந்து தமிழுக்கு “ நானிலு” அறிமுகப்படுத்தினார் – அதன் தாக்கத்தில் எனது முதல் நானிலு – தமிழ்க் கவிதைகள் )
.........கா.ந.கல்யாணசுந்தரம்
நானிலு .... ( தன்முனைக் கவிதைகள் )

·        மை ஊற்றி எழுதிய
தூவல்கள் அலமாரியை
அலங்கரிக்கின்றன
எனது கவிதை வரிகளுடன் 


·        குளத்தில் வீசிய கல்லொன்று
நீர் வட்டங்களைத் தந்தது
எனது கைகளின் வலிக்கு
மருந்தானது

·        முன்பின் தெரியாவிட்டால்
ஒன்றும் கவலைவேண்டாம்
நாம் அமர்ந்து கொண்டது
எதிரெதிர் இருக்கைகளில்

·        தேனிர் கடைக்குள் பறந்து
எனக்கான கோப்பையில்
அமர்ந்துவிட்டுப் போனது
வண்ணத்துப்பூச்சி

·        உனது பயணப் பாதையில்
மலர்கள் உதிர வேண்டும்
எனது மனமெங்கும்
மென்மையின் சுவாசம்

மெல்ல வரும் விடியல்
காலை நடைபயணத்தில்
பனி விலகி மேலெழும்ப
வந்தமரும் பட்டாம்பூச்சி

·        எதிரெதிரே சந்தித்தபின்னும்
எனது மௌன மொழிக்குள்
கவிதை எழுதிச் செல்கிறாள்
ஒரு ரசிகை

·        தூரத்தில் இணையும்
இருப்புப்பாதைகள் அருகில்
அமர்ந்தும் உறவை வெறுக்கும்
மனக் காயங்கள்

·        நூல்கண்டு குறைந்துகொண்டே
வந்தாலும் பறந்தபடி
உயரும் பட்டத்தில்
தெளிவாய் எனது வருங்காலம்

·        எனக்குள் யாசிக்கும்
வார்த்தைகளை தேர்ந்தெடுப்பதில்
முனைப்புடன் நிற்கின்றன
சமுதாய நிகழ்வுகள்  


.........கா.ந.கல்யாணசுந்தரம்